Mea interest illustrissime ac excellentissime princeps Johannes de Bentivolijs ut in omnibus his quibus mee sufficiunt vires meumque potest ingenium tue semper studeam dominationi ob ingentia mihi beneficia a te collata die noctuque complacere. Tue preterea virtutes ac benignitas, que omnem virum discretionis capacem in tuum amorem impellunt me ad tibi perpetuo serviendum etiam inclinant. Tue insuper dignissime prosapie de Bentivolijs antiquum nomen et erga populum tuum bononiensem ingentia merita ac humanitas non parva que semper extitit quoslibet ad te diligendum alliciunt. Quid longius illustrissime Domine, de te repetam, nos his nuper diebus vidimus quanto studio, quanto labore quantaque caritate in populum tuum bononiensem fame admodum laborantem usus es. Nam si tua non affuisset dominatio, quot pauperes viri fame periissent, que seditiones et tumultus, queve scandala in hac urbe fames hec adductura erat. Tu gelator pacis, tu benignus, tu misericors, tu pius tuque humanissimus existis. O felicia tempora que te tulerunt felix patria, que aluit, felix populus, cui te frui contigit. His itaque commotus, rebus quoddam meo iudicio dignissimum opus et varium et magno labore ac lucubratione compositum, tibi nominique tuo dedicare constitui non parum pro materia et rerum varietate delectationis ac emolumenti alaturum tibi arbitratus, cum rerum naturalium causas hincinde diligenter investigatas et eductas in maternum sermonem de latino traduxi opus idcirco magis commune ratus. Quid enim iocundius, quid delectabilius, quid prestantius, quidve magis humano intellectui satisfaciens quam rerum causas cognoscere sermone pariter claro et aperto, id attestante Virgilio Marone in Georgico et enim nostri philosophiam ac omnium rerum naturalium scientiam tetris sermonibus ambiguisque scripturis celabant. Ego autem Hieronimus De Manfredis, ut omne humanum genus posset ea intelligere nec tam digna rerum cognitione fraudaretur, elaboravi eorum sententias dilucidando ac in publicum effundendo tue illustrissime dominationi precipue compulsus amore. Et easdem per quesita et responsiones exaravi, quod tibi et omnibus legentibus delectabilissimum fore arbitro simulque desidero. Et si perpetuum fuerit hoc opus ut deum maximum oramus, efficiat non nihil etiam apud futuram posteritatem ad gloriam nominis tui perpetuandam labor noster afferet ; quod etiam nobis defunctis per eaque te prosequor affectione optatissimum eveniet, tuque feliciter vale princeps illustrissime, tuamque felicem ac prosperam sortem fata conservent.